أشرف فايق يعلن كتابة جزء ثان من فيلم الزمهلاوية ويكشف كواليس الجزء الأول

أعلن المخرج أشرف فايق عن كتابة جزء ثان من فيلمه "الزمهلاوية"، الذي حقق نجاحًا كبيرًا في جزئه الأول، لكنه لم يدخل بعد حيز التنفيذ.

تصريحات أشرف فايق عن الجزء الثاني

وقال أشرف فايق خلال لقائه ببرنامج "الكورة فن" الذي تقدمه الإعلامية دينا سليم على راديو ON Sport F.M: "في الوقت اللي اتعمل فيه فيلم 'الزمهلاوية'، جالي أكثر من عرض لإنتاج جزء تاني، ومن ضمنهم من 3 رجال أعمال أصحاب عزت أبو عوف. الجزء التاني اتكتب وبتطور فيه: ماذا لو احنا رجعنا للناس دي بعد كل الفترة دي، إيه اللي حصل؟ وكتبت فيلم عن قصة حياة محمد صلاح وبطولة محمد صلاح هذا اللاعب الأسطورة".

كواليس الجزء الأول من الفيلم

وتحدث أشرف فايق عن الجزء الأول من الفيلم قائلاً: "وأنا بصور الفيلم، ألتراس أهلاوي كان مستاء جدًا مني عشان قلت 'الزمهلاوية'. قلتلهم: أنا تحت أمركم، سموا الفيلم 'الأهلي الأول'. أنا جبت اسم الفيلم من عبد الحليم حافظ في برنامج 'عالناصية' لما سألته: أنت أهلاوي ولا زملكاوي؟ قال: أنا زمهلكاوي. دا أذكى حاجة اتقالت في الدنيا عشان ميخسرش الجمهور".

—

وأضاف أشرف فايق: "الفيلم مكتوب قبل تنفيذه بـ10 سنين. كان في أكثر من 7 جهات إنتاج كانت عايزة تعمله. أنا كنت عايز اتكلم عن التعصب في كرة القدم، مش عند الأهلي والزمالك بس، عند كل الفرق. ولما جيت أنفذ الفيلم، لاعيبة كرة أنا كنت عايزهم في الفيلم اترعبوا. زي حازم إمام، احترمته جدًا، قال لي بشكل واضح: 'مش بتاعتي'. حازم إمام بالنسبة للزمالك الرمز. أما في عمرو زكي وجمال حمزة اللي عملوا الفيلم، أنا كنت عايز حازم إمام، كنت عايز عماد متعب، ومنفعش. وفي لاعيبة مضوا العقد وخافوا قبل التصوير. اتفقت مع محمد شوقي وعمرو زكي وعصام الحضري وباقي اللاعيبة أننا نقعد نعمل إعداد للمثل، لكن فجأة سافروا واحترفوا برا، فكانوا بيجولي هربانين في الراحة اليومين. فغيرت الخطة ومقعدتش معاهم، ومرنتهم ومعملوش بروفات. كنت بتعامل مع كل لاعب على شخصيته الحقيقية. الحضري بالتحديد، أنا كتبتله المشهدين بتوعه بشكل ساخر عشان أصالح الجمهور اللي كان زعلان من الحضري، وبكى وقت التصوير لما قال إنه مهربش وكان عنده طموح للاحتراف. أما عمرو زكي، بلدوزر وعشوائي، لدرجة أنه في مشهد من المشاهد قرر لوحده أنه يغني لعمرو دياب، وسبته يغني".

أبطال فيلم الزمهلاوية

وفيلم "الزمهلاوية" من بطولة عزت أبو عوف، صلاح عبد الله، هالة فاخر، انتصار، أحمد عزمي، بشرى، نرمين ماهر، لارا، طلعت زين، وحيد سيف، حسن مصطفى، وعدد كبير من الممثلين بجانب نجوم كرة القدم: جمال حمزة، عمرو زكي، خالد بيبو، محمد شوقي، أحمد سمير فرج، وعصام الحضري.